रोनाल्डोको अर्को ह्याट्रिक

एजेन्सी, २० वैशाख – क्रिस्टियानो रोनाल्डोको अर्को ह्याट्रिकको मदतले रियल म्याड्रिडले युरोपेली च्याम्पियन्स लिग सेमिफाइनलको पहिलो लेगमा मंगलबार राति एटलेटिको म्याड्रिडलाई सजिलै ३–० ले हराएको छ ।
यस जितसँगै रियल पछिल्लो चार वर्षमा तेस्रो पल्ट च्याम्पियन्स लिगको फाइनल नजिक पुगेको छ । बर्नाबाउमा भएको खेलमा रियल आफ्नो छिमेकी एटलेटिकोमाथि पूर्णत: हाबी रह्यो ।
रोनाल्डोले दसौं मिनेटमा पहिलो गोल गरे । त्यसयता ७३ र ८६ औं मिनेटमा गोल गर्दै आफ्नो ह्याट्रिक पूरा गरे । अब एटलेटिको सामु आफ्नो घरेलु मैदानमा हुने दोस्रो लेगको खेलमा यो हारको नतिजा उल्टाउने कठिन अवसर भने हुनेछ ।