बागलुङ, १० बैशाख – राष्ट्रिय उपभोक्ता मञ्च बागलुङले काठेखोला गाउँपालिका र गलकोट नगरपालिकामा बजार अनुगमन गरेको छ । बजार अनुगमनको क्रममा गलकोट नगरपालिका–८ काँडेबास बजारमा ईजाजत बिना मेडिकल सञ्चालन गरेको पाईएको छ । गोबिन्द सापकोटाले कुनै ईजाजत र योग्यताको प्रमाणपत्र बिना नै सापकोटा मेडिकल हल सञ्चालन गरेको भेटिएको मञ्चले जनाएको छ । १२ वर्षदेखि अवैधानिक मेडिकल सञ्चालन गरेको भेटिएपछि सापकोटालाई ७ दिनभित्र जिल्ला प्रशासन कार्यालयमा हाजिर हुन निर्देशन दिईएको मञ्चका अध्यक्ष शैलेन्द्र कुमार श्रेष्ठले जानकारी दिए । त्यसैगरी, गलकोट नगरपालिका–६ जँगरामा सञ्चालित बिबेक फार्मेसीका सञ्चालक संग पनि कुनै कागजात नभएको पाईएकोले जिल्ला प्रशासन कार्यालयमा उपस्थित हुन निर्देशन दिएको श्रेष्ठले बताए । बजार अनुगमनका क्रममा सवैभन्दा बढि मिट मसला म्यादको म्याद गुज्रिएको भेटिएकोले बरामद गरिएको जिल्ला प्रशासन कार्यालयका नासु विष्णुप्रसाद शर्माले जानकारी दिए । काँडेवास र हरिचौर बजारका केहि किराना पसलबाट मसला बरामद गरिएको हो । त्यसैगरी लेवल न राखिएको भुजा र चामल समेत बरामद गरिएको शर्माले बताए । अनुगमनको क्रममा बिहुँ भ्यु टावरमा संञ्चालित रेष्टुरेण्ट बिना दर्ता सञ्चालन भएको पाईएको छ । अनुगमनका क्रममा उपभोक्ता अधिकार, ऐन नियमको बारेमा समेत ब्यापारी र उपभोक्तालाई जानकारी गराईएको थियो । उपभोक्ता हित बिपरितका मेडिकल सञ्चालक र अखाद्य बस्तु बिक्री गर्ने बिक्रेतालाई जिल्ला प्रशासनमा बोलाएर आवश्यक छानबिन गरि हद सम्मको कारबाही गर्ने मञ्चले जनाएको छ । अनुगमनमा प्रहरी र पत्रकारको समेत सहभागी थिए ।
