काठमाडौं, २० चैत — आतंकवादी संगठन इस्लामिक स्टेट (आईएस) र अलकायदाले ल्यापटप जस्ता विद्युतीय उपकरणमा फिट हुने बम बनाइरहेको खुलासा भएको छ । सञ्चारमाध्यमहरूमा प्रकाशित समाचार अनुसार यस्ता ल्यापटप बमहरूले एयरपोर्टका सेक्युरिटी स्क्यानरहरूलाई पनि झुक्याउन सक्छन् ।
रिपोर्टमा भनिएको छ, ‘यही खतरालाई मद्देनजर गरेर अमेरिका र बेलायतले आठ मुसलमानबहुल देशका नागरिकहरूलाई हवाईयात्रामा विद्युतीय उपकरण लिएर हिँड्न प्रतिबन्ध लगाएका हुनसक्छन् ।’ जासूसी संस्थाहरूले रिपोर्टमा भनेका छन्, ‘आतंकवादी समूहहरूले एयरपोर्ट स्क्यानर प्राप्त गरेर ल्यापटप बमको परीक्षण गरिरहेका छन् ।’
आतंकवादीहरूले खासगरी कमर्सियल एयरलाइन्सहरूलाई लक्षित गरिरहेको भेटिएको छ । यससम्बन्धमा अमेरिकी सरकारले यस्तो प्रतिक्रिया दिएको छ, ‘प्राप्त सूचनामाथि लगातार समीक्षाहरू भइरहेका छन् र नयाँ सूचना पनि जम्मा गरिएको छ । यात्रुहरूलाई सुरक्षित राख्नका लागि अनेकौं सुरक्षा घेराहरू बनाइँदैछ ।’आतंकवादी समूहसँग कति क्षति पु–याउने क्षमता छ, त्यसको जाँचपरख भइरहेको अमेरिकी अधिकारीहरूले बताए ।-दैनिक भास्करबाट
