बागलुङमा ५३ औंं राष्ट्रिय खेलकुद दिवस मनाइयो

बागलुङ, १४ भदौ – जिल्ला खेलकुद विकास समिति बागलुङले राष्ट्रिय खेलकुद परिषदको ५३ औ स्थापना दिवस बागलुङमा पनि बिविध कार्यक्रम सहित मनाएको छ । दिवसका अवसरमा रुद्रे पिपलको कवर्ड हल परिसरमा सोमवार बिहान सरसफाई र साँझ खेलकुद विकास समितिको कार्यालय परिसरमा दिप प्रज्वलन गरिएको थियो ।
समितिका पदाधिकारी, सदस्य, खेल प्रशिक्षक, खेलाडी तथा खेलकुद सम्वद्ध सरोकारवालाको सहभागितामा गरिएको कार्यक्रमका अवसरमा बोल्दै धवलागिरी खेलकुद मण्डलका संस्थापक अध्यक्ष लक्ष्मणकुमार श्रेष्ठले खेलकुदले स्वस्थ जीवन र राष्ट्रको पहिचानका लागि महत्वपुर्ण भुमिका निर्वाह गरेको बताए ।
उनले खेलकुदलाई अझै व्यवस्थित र संस्थागत हिसावले अगाडी बढाउन सके राम्रा खेलाडीहरुको खेल क्षेत्रमै भविष्य सुनिश्चित हुने बताए । कार्यक्रम जिल्ला खेलकुद विकास समितिका उपाध्यक्ष शम्भु आचार्यको अध्यक्षता, सदस्य सचिव भिमसेन शाक्यको सञ्चालनमा सम्पन्न भएको थियो ।