एर्लिङ हालान्डको शानदार प्रदर्शनमा नर्वे फिफा विश्वकप २०२६ को क्वाटरफाइनलमा प्रवेश गरेको छ।
अन्तिम १६ अन्तर्गत सम्पन्न खेलमा नर्वेले पाँच पटकको विश्वविजेता ब्राजिललाई २–१ ले पराजित गर्दै पहिलोपटक विश्वकपको अन्तिम आठमा स्थान सुरक्षित गरेको हो।
नर्वेको जितमा दुवै गोल एर्लिङ हालान्डले गरे। उनले ७९औँ मिनेटमा पहिलो गोल गर्दै टोलीलाई अग्रता दिलाए भने ९०औँ मिनेटमा दोस्रो गोल गर्दै जित सुनिश्चित गरे।
ब्राजिलका लागि इन्जुरी समयको ९०+१०औँ मिनेटमा नेयमारले पेनाल्टीमार्फत सान्त्वना गोल फर्काए। तर त्यो गोल ब्राजिललाई हारबाट जोगाउन पर्याप्त भएन।
यससँगै हालान्डले जारी विश्वकपमा आफ्नो गोल संख्या ७ पुर्याएका छन्। गोल्डेन बुटको प्रतिस्पर्धामा उनी अर्जेन्टिनाका लियोनेल मेसी र फ्रान्सका किलियन एम्बाप्पेसँग समान ७-७ गोलका साथ शीर्ष स्थानमा रहेका छन्।
अब नर्वेले सेमिफाइनल प्रवेशका लागि क्वाटरफाइनलमा इंग्ल्यान्ड र मेक्सिकोबीचको विजेतासँग प्रतिस्पर्धा गर्नेछ।
उता, पाँच पटकको विश्वविजेता ब्राजिलको विश्वकप यात्रा भने अन्तिम १६ मै टुंगिएको छ। हालान्डको उत्कृष्ट प्रदर्शनसँगै नर्वेले पहिलोपटक विश्वकपको क्वाटरफाइनलमा पुग्दै नयाँ इतिहास रचेको छ।