एसिया कप छनोटमा नेपाल समूह एफमा

बागलुङ, १० माघ – एएफसी सोलिडारिटी कप विजेता नेपाल एसियन कप २०१९ अन्तिम चरणको छनोटमा फिलिपन्स, ताजिकिस्तान र यमनसँगै समूह ‘एफ’मा परेको छ । अवुधावीमा सोमबार गरिएको ‘ड्र’मा नेपाल ‘पट ४’ मा रहेको थियो । त्यसैले नेपालले ‘होम एन्ड अवे’को आधारमा हुने अनितम चरणको छनोटमा स्वभाविक रुपमा बलियो टिमको सामना गर्नुपर्ने भएको छ ।
नेपाल फिफा वरीयताको १ सय ७५ औं स्थानमा छ । वरीयतामा तीनै प्रतिद्वन्द्वी नेपालभन्दा माथि छन् । यमन १ सय ४९, ताजिकिस्तान १ सय ३२ र फिलिपिन्स १ सय २२ औं स्थानमा छन् ।
नेपालले फिलिपिन्ससँग पछिल्ला समय निरन्तर हार बेहोर्दै आएको छ । र, उही टिमसँग फिलिपिन्समै २८ मार्च, २०१७ मा हुने खेलबाट नेपालले एसियन कप २०१९ मा अन्तिम चरणको छनोट सुरु गर्नेछ ।
अन्तिम चरणको छनोटमा २४ टिम सहभागी छन् । उनीहरुलाई ‘ड्र’मार्फत् चार–चार टिमको ६ समूहमा राखिएको छ । प्रत्येक समूहको शीर्ष दुई टिम एसियन कपमा छनोट हुनेछन् । डिफेन्डिङ च्याम्पियन अस्ट्रेलिया, जापानलगायत विश्वकप २०१८ मा एसियाली छनोटको अन्तिम चरणमा पुगेका १२ देशले यसअघि नै एसियन कपको यात्रा पक्का गरिसकेका छन् ।
नेपालले फाइनलमा मकाउलाई हराएर नोभेम्बर, २०१६ मा भएको एएफसी सोलिडारिटी कपको उपाधि जितेको थियो । यसवीच गुआमले एसियन कप छनोटबाट हात झिक्यो र कुवेत फिफाको कारबाहीमा पर्‍यो । त्यसैले एसियाली फुटबल महासंघ ९एएफसी० ले सोलिडारिटी कपको नतिजाको आधारमा नेपाल र मकाउलाई फेरि एसियन कप छनोट खेल्ने अवसर दिएको हो । त्यसअघि नेपाल एसियन कप छनोट चरणको प्ले–अफमा भारतसँग हारेको थियो ।
नेपालका खेलहरु
२८ मार्च २०१७    फिलिपन्सविरुद्ध (अवे)
१३ जुन, २०१७    यमनविरुद्ध (होम)
५ सेप्टेम्बर, २०१७    ताजिकिस्तानविरुद्ध (होम)
१० अक्टोबर, २०१७    ताजिकिस्तानविरुद्ध (अवे)
१४ नोभेम्बर, २०१७    फिलिपिन्सविरुद्ध (होम)
२७ मार्च, २०१८        यमनविरुद्ध (अवे)