जोमसोम : उत्तरी चीनको स्वशासित क्षेत्र तिब्बतसँग सिमाना जोडिएको कोरला नाकाको तिब्बती भूमि लिजीमा तिब्बती व्यापारीहरूको व्यावसायिक स्टलसँगै उपल्लो मुस्ताङीले समेत व्यावसायिक स्टल राखेका छन्।
कोरोना कहरको जोखिम देखाउँदै चीन पक्षले लगातार ४ वर्षसम्म बन्द गरेको कोरला नाका गत कात्तिक २७ गते औपचारिक रुपमा खुल्ला गरेको हो। प्रधानमन्त्री पुष्पकमल दाहाल ‘प्रचण्ड’को चीन भ्रमण लगत्तै खुला गरिएको कोरला नाकामा उपल्लो मुस्ताङीले मात्रै सीमापार अनुमतिपत्र पाएका छन्।
कोरला नाका खुलेको ७ महिनापछि वैशाखदेखि नेपाल पक्षबाट पनि कोरला नाकाको तिब्बती भूमि लिजीमा व्यावसायिक स्टल राखेर व्यापार गर्न सुरु गरेको मुस्ताङका प्रमुख जिल्ला अधिकारी जनकराज पन्तले जानकारी दिए।
उनले सीमापार पास पाएका दर्जन नेपाली व्यापारीले स्थानीय उत्पादनका साथै चाउचाउ,चामल, मदिरा, पिठो, बिस्कुट र गलैंचा आदि लगेर बिक्री गर्ने गरेको सुनाए। उता चीनको तिब्बती भूमि लिजीबाट मुस्ताङले खाद्यान्न, लत्ता कपडा, कस्मेटिक सामान, कृषि उपकरण, किराना सामान र लत्ताकपडा आदि आयात गर्ने गरेको प्रजिअ पन्तले बताए।
उत्तरी चीनको कोरला नाका औपचारिक रुपमा खुला भएसँगै हालसम्म जिल्ला प्रशासन कार्यालय मुस्ताङले उपल्लो मुस्ताङका १ हजार ५२० जनालाई सीमापार पास वितरण गरिसकेको छ। अन्नपुर्ण पोष्टअनलाइनबाट
