नेपाल राष्ट्रिय लोक तथा दोहोरी गीत प्रतिष्ठान म्याग्दीको अयोजनामा निशुल्क योग शिविर शुरु भएको छ ।
बेनी बजारको कालिपुल स्थीत जिल्ला आयुर्वेद स्वास्थ्य केन्द्रको तालिम शुरु भएको योग शिविर आगामी साउन १२ गते सम्म संचालन हुने नेपाल राष्ट्रिय लोक तथा दोहोरी गित प्रतिष्ठान म्याग्दीका अध्यक्ष ध्रुव जिसीले बताउनुभयो ।
मानव स्वास्थ्यलाई अझ मजबुत बनाउने हेतुले थालिएको शिविरमा बेनी बजारबासी तथा प्रतिष्ठानका पदाधिकारी तथा सदस्यहरु समेतको सहभागीता रहेको छ । शिविरमा पवित्रा वोगटी केसीले योग अभ्यास गराउनुहुने अध्यक्ष जिसीले बताउनुभयो ।
नेपाल राष्ट्रिय लोकतथा दोहोरीगित प्रतिष्ठान म्याग्दीका संरक्षक एवम् अग्रज लोक गायीका धन कुमारी थापाले मनको शान्तिका लागि संगित जस्तै स्वस्थ्य र तन्दुरुस्त शरिरका लागि योग निकै महत्वपूर्ण हुने बताउनुभयो । कार्यक्रममा बेनी नगरपालिकाका ८ नं. वडा सदस्य यामबहादुर बानियाँ, शिक्षा मार्ग आमा समुहकी अध्यक्ष विष्णु केसी लगायतले शुभकामना व्यक्त गर्नुभएको थियो ।
२१ दिन सम्म योग शिविर संचालन गर्नका लागि प्रतिष्ठानको अनुरोधमा जिल्ला आयुर्वेद स्वास्थ्य केन्द्रले निशुल्क रुपमा हल उपलब्ध गराएको छ । हरेक दिन विहान ४ः४५ देखि ६ बजे सम्म योग अभ्यास गराईने प्रतिष्ठानका अध्यक्ष जिसीले बताउनुभयो । मानिस स्वस्थ रहनका लागि योगको आवश्यकता महशुस गरि निशुल्क रुपमा योग शिविर संचालन गरिएको उहाँले बताउनुभयो ।
शरिर निरोगी बनाउन तथा तनाव तथा थकान हटाउनका लागि समेत योग साधनाको महत्व छ, अध्यक्ष जिसीले भन्नुभयो, ‘जिल्लाका सवै कलाकारहरुलाई यो शिविरमा सहभागी हुन अनुरोध समेत गर्दछु’ ।
उद्घाटन कार्यक्रम अध्यक्ष जिसीको अध्यक्षता, प्रथम उपाध्यक्ष एकराज चापागाईको स्वागत र द्वितिय उपाध्यक्ष पदम विश्वकर्माको संचालनमा सम्पन्न भएको थियो ।
