अघिल्ला बर्षको तुलनामा यो बर्षको दशै बागलुङ बासीका लागि सुखमय रहेको अनुभव सबैले गरेका छन् । देश विदेशमा बसेकाहरु घर फर्केर आफन्तजनको हातबाट टिका थाप्ने दशै भएपनि विभिन्न घटनाक्रमले दशै दशाको रुपमा परिणत हुने गथ्र्यो । तर यो बर्ष सौभाग्यले कसैलाइ दशा बन्न पाएन । यो सबैका लागि सुखद पक्ष हो । विशेषगरी बर्षात सकिंनै लाग्दा दशै शुरु भएकोले ग्रामीण सडकहरु हिलाम्मे थिए भने क्षमता भन्दा धेरै यात्री कोचेर हिड्ने सवारी साधनले बढी दुर्घटना निम्तने गर्थे । यो बर्ष सरकारले क्षमता भन्दा धेरै यात्री राखेमा कारवाही गर्ने चेतावनी दिएको थियो भने प्रहरी प्रशासनले त्यस निर्देशनलाइ कार्यान्वयनमा ध्यान दिएको पाइयो । जसका कारण यातायात व्यवसायीले पनि आफ्ना सवारी साधन र चालकलाइ केही प्रशिक्षण दिएको समेत भेटिएको छ । फलस्वरुप दशैको १५ दिन सम्म जिल्लामा कुनै सवारी दुर्घटना, मदिरा सेवन र जुवातासका कारण कुनै घटना भएन । जिल्ला प्रहरीका अनुसार पनि कोही व्यक्तिलाइ जुवातास खेलेकै आधारमा, कुटपिटमा संलग्न भएको अरोपमा तथा अन्य दुर्घटना निम्त्याएको आरोपमा पक्राउ गरेको छैन । यस्तो सौभाग्य जिल्लाबासीले सबै चाडपर्व मात्र नभइ बर्षभरी पाउनु पर्छ । त्यसका लागि आम नागरिकमा सचेतना फैलाउन जरुरी छ । चाडपर्वको नाउमा फजुल खर्च गर्ने, खेललाइ जुवातास र पैसाको खोलो बगाउने काममा लगाउँदा धेरै घटना हुने गरेको तथ्यांक अघिल्ला बर्ष देखिन्थ्यो । यो बर्ष पक्कै पनि प्रशासन र प्रहरीले राम्रो सक्रियता देखाएको मान्नुपर्छ । साथै ग्रामीण कच्ची सडकमा जोखिम मोलेर गरिने यात्रालाइ सुरक्षित बनाउन जो जसले महत्वपूर्ण भूमिका खेलेका छन्, त्यो प्रसंसनीय छ ।
भौगोलिक कठिनाइका कारण जिल्लामा खनिएका १ हजार २ सय किमी मोटरबाटो मध्ये सहज, सजिलो र स्तरउन्नती भएको निकै कम छ । तर पनि जुन सचेतना अपनाइएको छ त्यस्तो सचेतना हिउद वा बर्षातका हरेक दिन हुन जरुरी छ । नगरपालिका र जिविस जस्ता विकासे संस्थाले ग्रामीण र मुख्य राजमार्गका सडक स्तरउन्नतीमा बढी ध्यान दिन जरुरी छ । क्षमताभन्दा बढी यात्री राख्दा दुर्घटनाको संभावना बढी हुने मात्र नभइ एउटै घटनामा धेरैको ज्यान जाने खतरा हुन्छ । त्यो कुरा बुझ्ने प्रयास शुरु भएकोमा व्यवसायी र चालकहरु पनि धन्यवादका पात्र भएका छन् । यो प्रसंसाले निरन्तरता पाओस भन्ने आम नागरिकको चाहना छ । सरकारले ल्याएको नीतिलाइ पालना गर्नु सबैको कर्तव्य पनि हो । धमाधम खुलेका यातायात समितिहरुले पनि चालक, सहचालकलाइ उचित तालिम दिएर सबैको यात्रालाइ सुरक्षित बनाउने काममा सहजीकरण गराउन सक्नुपर्छ । यात्रीहरुमा पनि केही सचेतना पलाएको हुनुपर्छ । जवरजस्ती कोचिएर यात्रा गर्ने बानी हटाएर ढीला भएपनि सुरक्षित गन्तव्य रोज्न सक्नुपर्ने अहिलेको आवस्यकता हो । बिजयादशमी २०७३ले यो सन्देश दिएको छ अवका दिनमा यो अभियानलाइ पालना गरेर अगाडि बढ्न सबैलाइ प्रेरणा मिलोस् ।
