सुनको मूल्य घट्दै गएपछि कारोवार वढ्दै

बागलुङ, २८ असोज – दसैँको सुरुवातसँगै सुनको मूल्य घटेकाले कारोबार बढ्दै गएको नेपाल सुनचाँदी व्यवसायी सङ्घले जनाएको छ ।दसैँको घटस्थापनाको दिन प्रतितोला ५८ हजार ३०० रूपैयाँमा कारोबार भएको छापावाल सुनको मूल्य शुक्रवार प्रतितोला ५६ हजार र तेजावी सुनको मूल्य ५५ हजार ७५० रूपैयाँ कायम रहेको छ ।
सङ्घका अनुसार घटस्थापनापछि पटक पटक गरी सुनको मूल्य घटेर प्रतितोला दुई हजार ३०० रूपैयाँ घटेको छ । अन्तर्राष्ट्रिय बजारमा सुनको मूल्यमा कमी आएसँगै नेपालमा पनि त्यसको प्रभावले मूल्य घटेको सङ्घका अध्यक्ष मणिकरत्न शाक्यले बताउनुभयो ।
अध्यक्ष शाक्यका अनुसार विगतमा दसैँ, तिहार, विवाहकायाममा दैनिक ३० किलो सुनको कारोबार हुने भए पनि मूल्य उच्च भएका कारण कारोबारमा नकारात्मक प्रभाव परेपछि यस वर्ष करिब ४० किलो दैनिक व्यापार भइरहेको छ । त्यसैगरी असली चाँदीको मूल्य ८६० बाट घटेर रु ८१० रूपैयाँ कायम भई कारोबार भइरहेको सङ्घले जनाएको छ ।