राम्रो काममा स्वार्थको अवरोध

आईतबार बागलुङ बजारका पेटीमा सामान राखेर व्यापार गर्नेहरु बिहानै झस्किए । नगरपालिकाले पटक–पटक आग्रह गर्दा समेत पेटीमा राखेर समान बेच्न नछोडेपछि गत माघमा भएको निर्णयलाई व्यवहारिक रुपमा नै कार्यान्वयनमा ल्याउनका लागि नगरपालिकाका कर्मचारी, प्रशासन र जनप्रतिनिधि समेतको टोलीले पेटीमा राखेका सामानहरु उठाएर नगरपालिका र प्रहरीको गाडीमा हाल्यो । गत माघको २२ गते बसेको सवर्वपक्षीय बैठकले पेटीमा सामान राखेर व्यापार गर्नेलाई सहज रुपमा हटाएर नगरपालिकालाई सहयोग गर्न आग्रह गरेको थियो । सानो सटर २÷३ हजार रुपैयाँ तिरेर भाडामा लिने र सोही सटरको एक सय मिटर अगाडिसम्म टनाटन सामान राखेर बेच्ने प्रवृत्ति मौलाएको बजारको लागि त्यो निर्णय मान्य थिएन । नगरपालिकाले हस्ताक्षेप गरेपछि बाहिर आएका केही कुराहरु जानकारी नगराईएको वा एक्कासी छापामार शैलीमा उत्रिएका कारण बिरोध गर्नुपरेको भनिएपनि खास व्यवसायीको भित्रि आसय भनेको सडकलाई समेत आफ्नो बसमा लिएर व्यापार गर्न पाउनु पर्छ भन्ने नै हो ।
एकातर्फ बजारमा बढेको सवारीको चापका कारण छुट्टीको दिनमा बाहेक बागलुङ बजारमा सर्वसाधारणलाई आवतजावतमा समस्या छभने अर्कोतर्फ सटरको १ सय मिटर अगाडिसम्म बेच्नका लागि व्यापारीले राखेका समानका कारण बाटो बन्द जस्तै अवस्थामा छ । व्यापारीले सडकको छेउसम्म राखेको सामानका कारण मानिसहरु ओहोरदोहोर गर्ने बाटो बन्द मात्रै भएको छैन् बाहिरी जिल्लाबाट यहाँ आउने मानिसको नजरमा बागलुङ बजार कुरुप बजारको रुपमा परिचित भैरहेको छ । पेटी कब्जा गरेका कारण ओहोरदोहोर गर्ने मानिसले सवारीका लागि बनाईएको बाटोको प्रयोग गर्दा सावारीको भिड बढिरहेको छभने दुर्घटनाको जोखिम पनि उत्तिकै छ । यस्ता खालका समस्याको समाधान खोज्नकै लागि नगरपालिकाले खोजेको उपायमा बजारबासी व्यापारीले सहयोग गर्नुको सट्टा नानाथरीका आरोपहरु लगाएर नगरपालिकालाई गाली गर्नु सुन्दर बागलुङको लागि राम्रो पक्ष होईन । काम सुरु नगर्ने बेलासम्म यस्तो र उस्तो नगरेको भन्दै स्थानिय सरकारको उछितो काँड्ने र काम सुरु गरेपछि असहयोग गर्ने परिपाटीको अर्को नमुना बागलुङ बजारमा हटाउन लागिएको पेटीको व्यपारमा देखियो यो दुःखद कुरा हो ।
आईतबारको घटनालाई नजिकबाट नियाल्ने हो नगरपालिकाको बर्तमान सत्तामा रहेको शक्तिलाई कमजोर बनाउने मौका समेत यहि बेला छोपीएको जस्तो देखीएको छ । उद्योग बाणिज्य संघले निकालेको प्रेस बिज्ञप्तीमा मादक पदार्थ सेवन गरेका कर्मचारीको दादागिरीपन भनेर उल्लेख हुनु र पेटीबाट उठाएर गाडीमा राखिएका सामान व्यापारीले नै सडकमा फ्याँक्ने र नगरपालिकाले यत्रतत्र फ्याँक्यो भनेर आरोपित गर्ने काम सत्ता पक्ष र बिपक्षको लडाईंको जस्तो देखियो । अन्तरहृदयमा जे जस्ता स्वार्थहरु लुकेका भएपनि नगरपालिकाले सुरु गरेको पेटीहरु खाली गर्ने काम एकाध व्यापारीको स्वार्थमा नरहेको भएपनि आम बागलुङबासीको हितमा रहेको कुरामा कसैको दुई मत नहोला । बजारलाई सुन्दर र व्यवस्थित बनाउनका लागि नगरपालिकाले चालेको कदममा राजनीतिक पुर्वाग्रह र व्यक्तिगत स्वार्थ होईन सामाजिक हितलाई ह्रदयमा राखेर सबैले आ–आफ्नो क्षेत्रबाट सहयोग गरौं । सुन्दर तथा व्यवस्थित नगर निर्माण यहाँका राजनीतिक दल, व्यापारी व्यवसायी, पेसाकर्मी र आमनागरिक सबैको दायित्व हो ।