स्तरोन्नतिमा सारथी

बागलुङ नगरपालिकाले बजार क्षेत्रभित्र सडकको मापदण्डभित्र जग्गा मिचेर बनाईएका घरका पेटी भत्काउने काम सुरु गरेको छ । पुर्वघोषित कार्यक्रम अन्र्तगत नगरपालिकाले पेटी भत्काउने, नाली बनाउने र सडक मर्मत गर्ने कामको थालनी गरेको हो । यस आर्थिक बर्षमा बजेट विनियोजन गरेर काम अगाडि बढाउने भनिएको भएपनि निकै ढिलो गरी यो काम सुरु भएको छ । निर्वाचित भएर नगरको सत्तामा रहेको दलको मुख्य चुनावी एजेण्डाको रुपमा रहेको बजारको व्यवस्थापनको काम ढिलै भएपनि सुरुवात हुनु स्वागतयोग्य कुरा हो । जिल्लाको सदरमुकाम रहेको बागलुङ नगरपालिकाको बजार क्षेत्रभित्र रहेका साँघुरा सडकमा सवारी साधन आवतजातसम्म गर्न सक्ने सडक, सामान्य बर्षा हुँदा समेत ताल बन्ने सडक र नालीको उचित ब्यवस्थापन नभएकै कारण बागलुङ बजारका स्थानियले मात्रै हैन विभिन्न कामको शिलशिलामा यहाँ आउने अन्य स्थानिय तहका सर्बसाधारणले समेत दुःख पाउने गरेका थिए ।
नगरपालिकाले बजार क्षेत्रभित्र पहिलो प्राथमिकतामा राखेर नालीको ब्यवस्थापन र सडकलाई फराकिलो बनाउने काम गर्नु पर्दथ्यो तर ढिलो गरि अझै भनौ आर्थिक बर्षको अन्ततिर आएर मात्रै काम सुरु भएको छ । काममा ढिलाई हुनुमा केही स्वार्थ वा बाध्यता होलान त्यो कुरा नगरपालिकाले जान्ने कुरा हो । तर आम सर्वसाधरणको माग र चासोको बिषय भनेको बजार क्षेत्रभित्र बिना राजनीतिक पुर्वाग्रह सबैका मिचेर बनाईएका पेटी भत्काउने र नाली तथा बाटोलाई व्यवस्थित बनाईयोस भन्ने हो । नागरिकको चाहना बुझेर कामको सुरुवात गरेको होभने नगरपालिकाको कामलाई धन्यवाद दिनै पर्छ । यदि आर्थिक बर्षको अन्त हुनै लाग्दा कामको सुरुवात गर्ने र केही विावद वा रोकावट भएमा समयको सिमा सकिएको निहुँमा अर्को बर्षको लागि योजनाको काम लाने हिसाबले कामको सुरुवात गरिएको होभने नागरिकको तहबाट खबरदारी गर्नैपर्छ । नगरपालिकाले बनाउन लागेको वा भत्काउन लागेका काममा त्यहाँ रहेका एकाध पधाधिकारी वा कर्मचारीको स्वार्थका लागि हैन् । जिल्लाको सदरमुकामको बजार भएका हिसाबले नगरबासी र जिल्लाबासीको सहजताका लागी हो । अझै भन्नेहो भने जिल्लाको सदरमुकाममा रहेका संरचना सुधारको काम भनेको जिल्लाकै इज्जत र प्रतिष्ठासँग जोडिएको बिषय हो ।
नगरपालिकाले सुरु गरेको भत्काउने र बनाउने काममा आम नगरबासीले हातमा हात मिलाएर साथ दिनु अहिलेको आवश्यकता हो । आर्थिक बर्षको अन्तमा आएर सुरुवात भएको काम जस्तोसुकै सामान्य अबरोधका कारण पनि रोकिन सक्छ । यदि यो काम रोकिने होभने बागलुङ बजारमा बर्षा हुँदा साथ सडकमा जलासय हुने, नालीको पानी भान्छामा पुग्ने र सडक साँघुरो भएकै कारण हलुका सवारीलाई समेत घुमाएर आवत–जावत गर्नुपर्ने अवस्था कायमनै रहन सक्छ । त्यसैले समग्र नगरपालिका तथा नगरबासीको हित र जिल्लाबासीको इज्जतका लागि बागलुङ नगरपालिकाले बजार क्षेत्रमा गर्न लागेको बिस्तार तथा स्तरोन्नतीको काममा सबैले आ–आफ्नो तवरबाट बिना अबरोध सहयोग गर्न आवश्यक छ । नगरपालिकाले पनि सत्ताको आडमा नभई सबै पक्षसँग सल्लाह र सुझाव मागेर सोही अनुसार अघि बढ्नु नै बुद्धिमानी हुनेछ ।