खेलकुद महोत्सव

मुस्ताङ, ६ असोज – हिमालपारिको जिल्ला मुस्ताङको कोबाङमा ४६ औँ संस्करणको थाक खेलकुद महोत्सव बुधबारदेखि सुरु भएको छ । महोत्सव अन्तर्गत भएको पुरुष भलिबलको उद्घाटन खेलमा ताग्लुङले कोबाङलाई ३–२ को सेटमा पराजित गरेको छ ।
ताग्लुङले रोमाञ्चक जीत निकाल्ने क्रममा पहिलो दुई सेट २१–२५ र २१–२५ ले गुमाएको थियो । कोबाङको जीतका लागि एक सेट आवश्यक परेको अवस्थामा उत्कृष्ट पुनरागमन गर्दै ताग्लुङले अन्तिम तीन सेटमा २५–१३,२६–२४ र १५–१० ले नतिजा आफ्नो पक्षमा पार्न सफल भयो ।
अर्को खेलमा जोमसोमले टुकुचेलाई ३–० को सोझो सेटमा हरायो । जोमसोमले टुकुचेलाई २५–१७, २६–२४ र २५–१९ को सोझो सेटमा स्तब्ध पारेको होे ।
लिगकम नकआउटमा भएको पुरुषतर्फ ८ टिम र महिलामा ५ टिमको सहभागिता रहेको छ ।
पुरुषतर्फ सिक्स सोल्टी युवा घासा, अन्नपुर्ण युवा क्लब ताग्लुङ, निर्मल स्पोर्टिङ क्लब लेते, धौलागिरी युवा क्लब कोबाङ, निलगिरी युवा क्लब टुकुचे, जनकल्याण युवा क्लब जोमसोम, जनहित युवा क्लब स्याङ र मिलीजुली युवा क्लब मार्फाको टिमले प्रतिस्पर्धा गर्नेछन् ।
महिलातर्फ घासा, ताग्लुङ, लेते, कोबाङ र टुकुचेका टिमले एक आपसमा चुनौती पेश गर्नेछन् । महोत्सव अन्तर्गत बुधबार धनुषवाण प्रतियोगिता हुनेछन् । धनुषवाणमा कुल ९ टिमको सहभागिता रहने आयोजक थाक खेलकुद तथा साँस्कृतिक विकास संघका अध्यक्ष प्रेम प्रसाद तुलाचनले बताए ।
महोत्सवमा मुस्ताङको सस्कृति झल्कने किसिमको नृत्य र आफैले रचना गरेको संगीत प्रतियोगिता, मिस मुस्ताङ र कृषि प्रदर्शनीसमेत रहेको अध्यक्ष तुलाचनले बताए ।
प्रतियोगिताको वाणिज्य मन्त्री रोमी गौचन थकाली, व्यवस्थापिका संसद सदस्य महेन्द्र शेरचन र अध्यक्ष प्रेमप्रसाद गौचनले संयुक्त रुपमा रेफ्रीलाई बल हस्तान्तरण गरेर उद्घाटन गरेका थिए ।