कार्यक्रम संचालनको लागि त्रिपक्षिय सम्झौता

१० असोज, बागलुङ–स्थानीय स्तरमा रहेको युवा जनशक्तिको समावेशी विकाससहित स्थानीय स्तरमा स्वरोजगारी सिर्जना गरी युवा पलायनको अवस्थालाई न्यूनिकरण गरी ग्रामिण क्षेत्रमा युवा उद्यम विकास गर्ने उद्देश्यले राष्ट्रिय युवा परिषद्को दीर्घकालिन योजना र परिकल्पना अनुरुप नेपाल बचत तथा ऋण केन्द्रिय सहकारी संघ लि. नेफ्स्कून संगको सहकार्यमा सञ्चालित युवा उद्यम कार्यक्रम अन्तर्गत बागलुङमा सोमबार एक कार्यक्रमका बीच त्रिपक्षीय सम्झौता कार्य सम्पन्न भएको छ । जिल्ला युवा समिति बागलुङ, वित्तीय सेवा प्रदायक संस्थाको रुपमा सिवाईसी बचत तथा ऋण सहकारी संस्था लि. बागलुङ र जिल्लामा परियोजना सञ्चालनका लागि प्रस्ताव पेश गरी छनौट भएका उद्यम समुहबीच सम्झौता कार्य सम्पन्न भएको हो । युवा उद्यम कार्यक्रम सञ्चालनका लागि बागलुङबाट ४ वटा समुहहरु छनौटमा परेका थिए । १ उद्यम समुहमा १० जना व्यक्तिहरु रहने प्रावधान रहेको छ । छनौटमा परेका समुहहरुलाई कार्यक्रम सञ्चालनका लागि प्रत्येक समुहलाई ५ वर्षका लागि रु. ५ लाख रुपैयाँ निरब्याजे दिने र विभिन्न समयमा जिल्ला युवा समिति र सिवाईसीले उद्यम सञ्चालन भए नभएको बारेमा स्थलगत निरीक्षण गरी समुहलाई आवश्यक निर्देशन दिन सक्ने लगाएतका विषयहरु सम्झौतामा उल्लेख छ । सम्झौता कार्यक्रममा युवा विकास समिति बागलुङका प्रमुख कुश्मराज सुवेदी, सिवाईसी साकोसका अध्यक्ष चण्डिप्रसाद शर्मा पौडेल र नेफ्स्कून फिल्ड कार्यालय पोखराका प्रमुख जगन्नाथ लामिछानेले कार्यक्रमको बारेमा उद्यम समुहहरुलाई स्पष्ट पारेका थिए ।