वार्नलाई भेट्न उत्साहित सन्दीप

काठमाडौं, २२ भदौ – युवा क्रिकेटर सन्दीप लामिछाने आफ्ना आदर्श खेलाडी शेन वार्नसँगको भेट हुने सम्भावना लिएर थप उत्साहित छन् । अस्ट्रेलियाका विश्वकप विजेता कप्तान माइकल क्लार्कले मंगलबार अस्ट्रेलियामा खेल्ने सम्पूर्ण व्यवस्था मिलाएको घोषणा गरेसँगै सन्दीपको उत्साह अझ बढेको हो ।मेको अन्त्यमा हङकङमा सम्पन्न हङकङ ब्लिज ट्वान्टी–२० प्रतियोगितामा सन्दीपले क्लार्कसँगै खेलेका थिए । त्यही सन्दीपको प्रदर्शनबाट विश्व क्रिकेटका एक सफल खेलाडी क्लार्क प्रभावित भए । त्यसपछि क्लार्कले सन्दीपलाई अस्ट्रेलियामा खेल्न बोलाउनु र त्यसका लागि तयार भएर बस्नु भनेका थिए । नेपालको अन्तर्राष्ट्रिय खेल तालिका नभएको समय मिलाई क्लार्कले सन्दीपलाई अस्ट्रेलियामा बोलाएका हुन् ।
क्लार्कले हब्लोटको प्रायोजनमा १६ वर्षे लेग स्पिनर सन्दीपलाई अस्ट्रेलियामा खेल्न बोलाएको जनाएका छन् । सन्दीप अगस्ट १८ मा अस्ट्रेलियामा जाँदैछन् । क्लार्कले सोसल मिडियामा राखेको विज्ञप्तिअनुसार सन्दीपले माइकल क्लार्क क्रिकेट एकेडेमीमा ५ दिन प्रशिक्षण गर्नेछन् । त्यसपछि सन्दीपले वेस्ट सबर्बबाट खेल्ने छन् । सन्दीपले ५ महिना अस्ट्रेलियामा खेलेपछि जनवरीमा नेपाल फर्किने जनाए । अस्ट्रेलियामा उनले ग्रेड क्रिकेट खेल्ने छन् । अस्ट्रेलियामा यो क्लब/जिल्लास्तरीय प्रतियोगिता हो ।
‘सबैलाई थाहा छ, यो ठूलो अवसर हो । क्लार्कको अगाडि मैले यो अवसर पाएको छु, त्यसैले राम्रो सिक्ने प्रयास गर्नेछु,’ गृहनगर चितवनमा रहेका सन्दीपले भने, ‘अस्ट्रेलियामा गएर मैले कस्तो गर्छु, त्यसमा धेरै निर्भर गर्नेछ । कसैलाई निराश नबनाउने मैले आशा लिएको छु । सधैं–सधैं यस्तो मौका आउँदैन, मैले यो बुझेको छु ।’
माइकल क्लार्कको एकेडेमीमा सन्दीपले एक खेल खेल्ने छन् । त्यसमा क्लार्क खेल्ने–नखेल्ने निश्चित नभएको सन्दीप बताउँछन् । त्यसपछि वेस्ट सबर्बको नेतृत्व गर्दै क्लार्कको टोली मैदानमा उत्रनेछ । त्यहींबाट सन्दीपले खेल्ने छन् । सेप्टेम्बर २४ मा वेस्ट सबर्बले मोसमानसँग एलन बोर्डर ओभलमा क्लार्क र सन्दीप पहिलोपटक अस्ट्रेलियामा एकपटक मैदानमा उत्रिने छन् ।
‘सन्दीप उत्कृष्ट युवा हुन्, जो आफ्नो क्रिकेट जीवनमा रमाइरहेका छन् र खेलप्रति उनको ठूलो समर्पण छ । उनीजस्ता प्रतिभावान नेपाली क्रिकेटरले यत्रो यात्रा तय गरेर आफ्नो क्षमता देखाउन खोज्नु निकै उत्साहजनक छ र उनले मेरो एकेडेमीमा आफ्नो खेललाई माथि लैजाने छन् । म उनीसँगको सहकार्यका लागि प्रतीक्षामा छु,’ क्लार्कले जारी विज्ञप्तिमा भनेका छन् ।
क्लार्कले अगाडि भनेका छन्, ‘उनी मेरो क्लबमा सुहाउँछन् । वेस्ट सबर्ब पहिलादेखि नै युवा खेलाडीहरूको खोजी गर्दै आएको छ र उनी क्लबका लागि अमूल्य सम्पत्ति हुनेछन् ।’ वेस्ट सबर्ब क्षेत्रमा ठूलो संख्यामा नेपाली भएका कारण पनि सन्दीपलाई सिड्नीमा भिज्न सजिलो हुने क्लार्कको बुझाइ छ ।
चितवन क्रिकेट एकेडेमीमा सन्दीपले मंगलबार पनि दैनिक प्रशिक्षणलाई जारी राखेका थिए । नेपाली राष्ट्रिय टोलीका पूर्वकप्तान राजु खडकाले उनको प्रशिक्षणलाई निरन्तरता दिइरहेका छन् । ‘राजु सरले आफ्नो क्षमताअनुसार अस्ट्रेलियामा खेल्न भन्नुभएको छ,’ सन्दीपले भने ।
सन्दीपले जनवरी–फेब्रुअरीमा बंगलादेशमा आईसीसी यू–१९ विश्वकपमा १४ विकेट लिएका थिए र उनी सो प्रतियोगितामा सर्वाधिक विकेट लिने खेलाडीमा दोस्रो स्थानमा थिए । यो उनको पहिलो अन्तर्राष्ट्रिय प्रतियोगिता थियो । सो क्रममा उनले आयरल्यान्डसँगको खेलमा हयाट्रिक गरेका थिए । वैशाखमा सन्दीपले राष्ट्रिय टोलीबाट ‘डेब्यु’ गर्दै विश्व क्रिकेट लिग च्याम्पियनसिपमा नामिबियाविरुद्ध कीर्तिपुरमा २ खेलमा ३ विकेट लिएका थिए ।
हालै नेपालले गरेको इंग्ल्यान्ड र नेदरल्यान्ड्स भ्रमणपछि सन्दीपको अस्ट्रेलिया जाने तय भएको थियो । अस्ट्रेलियाको बिग बासमा खेल्ने सन्दीपको ठूलो सपना छ । अहिले भने उनको दिमागमा वार्न खेलिरहेको छ । सन्दीपलाई नेपाली वार्न पनि भनिन्छ । उनी अस्ट्रेलियाका पूर्वमहान् लेग स्पिनर शेन वार्नजस्तै विभिन्न शैलीमा बलिङ गर्छन् । सन्दीपले भने, ‘क्लार्कले शेन वार्नसँग पनि भेटाइदिन्छु भन्नुभएको छ । भेटेपछि वार्नसँग टिप्स लिन्छु ।’