मतपेटिकामा एसिड हालिएपछि रोल्पाको भनभनेमा मतदान स्थगित

रोल्पा, १४ असार– रोल्पाको धवाङस्थित भनभने मतदान केन्द्रमा एक जना मतदाताले मतदान गर्ने क्रममा लुकाएर लगेको एसिड मतपेटिकामा खसालेपछि सो मतदान केन्द्रको मतदान प्रकृया  रोकिएको छ । रोल्पा नगरपालिका १० स्थित मतदानकेन्द्रको ‘ख’  बुथको एक मतपेटिकाबाट बिहान साढे १० बजे धुलो उडेपछि घटना सार्वजनिक भएको थियो ।
कुनै मतदाताले मतदान गर्ने क्रममा एसिड छिराएको हुनसक्ने जिल्ला प्रहरी कार्यलय रोल्पाका डिएसपी रामप्रसाद घर्तीले जानकारी दिए । उनका अनुसार एसिड राख्ने व्यक्तिको पहिचान हुन सकेको छैन । घटनापछि सवै राजनीतिक दलका प्रतिनिधि र मतदानअधिकृतविच मतदान सुचारु गर्ने विषयमा छलफल भइरहेको डिएसपी घर्तीले जानकारी दिए । डिएसपी घर्तीका अनुसार ठुलो घटना नभएका कारण सवै दलका प्रतिनिधिहरुको रोहवरमा चाडै मतदान प्रकृया सुचारु गर्ने तयारी भइरहेको छ ।