दुर्घटनाग्रस्त विमानबाट तीनै जना जिवितै उद्दार

कुम्भराज राई
अोखलढुंगा, १३ जेठ – सोलुखुम्बुको  लुक्ला विमानस्थलमा गोमा एयरको कार्गो विमान दुर्घटना भएको छ। दिउँसो १:३० बजे काठमाडौंबाट कार्गो लिएर उडेको विमान लुक्ला विमानस्थलमा अवतरणका क्रममा दुर्घटना भएको हो।
लुक्ला विमानस्थलमा दुर्घटनाग्रस्त गोमा एयरको विमानबाट पाइलट र कोपाइलटको पनि जिवितै उद्दार गरिएको छ । स्थानीय र प्रहरीको प्रयासमा दुवैको उद्दार गरिएको हो । यसअघि विमानबाट एयर होस्टेस प्रज्ञा मानन्धरको उद्दार गरिएको थियो ।
कार्गो विमानमा तीन जना मात्रै थिए । उनीहरु तीनैको स्थानीय पासाङ ल्हामु अस्पतालमा उपचार भइरहेको छ । तीनमध्ये पाइलट पारस राईको अवस्था गम्भीर रहेको प्रत्यक्षदर्शी ङिमा शेर्पाले बताए ।
काठमाडौंबाट साढे १ बजे उडेको विमान लुक्ला विमानस्थलमा अवतरणको क्रममा धावनमार्गमा नपुगी डिलमा रहेको सल्लाको रुखमा ठोक्किएर १० मिटर तल खसेको थियो ।