रियाज एसियाली महंगा खेलाडि

एजेन्सी/पाकिस्तानका वहाब रियाज एकदिवसीय क्रिकेटमा रन खर्चिने मामिलामा एसियाली देशका सबैभन्दा महंगा बलर बन्न पुगेका छन् । गत मंगलबार इङ्ल्यान्डविरूद्धको तेस्रो एकदिवसीयमा उनले १० ओभरको पूर्ण स्पेलमा १ सय १० रन खर्चिएपछि उनी एसियाको सबैभन्दा महंगो बलर साबित भएका हुन् ।
यसअघि यो कीर्तिमान भारतका तीब्र बलर भुवनेश्वर कुमारको नाममा थियो। गत वर्ष २५ अक्टुबरमा दक्षिण अफ्रिकाविरूद्ध मुम्बईमा सम्पन्न खेलमा भुवनेश्वरले १० ओभरमा १ सय ६ रन खर्चेका थिए । उनले त्यतिबेला पहिलो ओभर मेडन गर्दा गर्दै पनि बाँकीको ९ ओभरमा १ सय ६ रन खर्चिनु परेको थियो ।
पाकिस्तानविरूद्धको खेलमा इङ्ल्यान्डले बिस्फोटक ब्याटिङ गरेको थियो, जसका कारण घरेलु टोलीले कीर्तिमानी ४ सय ४४ रन बनायो । यो रन एकदिवसीयमा अहिलेसम्मकै ठुलो कूल योगफल हो । इङ्ल्यान्डसँगको खेलमा वहाब रियाजले एसियाको महंगो बलरको नयाँ कीर्तिमान राखेपनि विश्व क्रिकेटमा उनीभन्दा बढी रन खर्चिने अस्ट्रेलियाका बलर छन् ।
अस्ट्रेलियाका माइकल लुइस एकदिवसीय क्रिकेटमा सबैभन्दा बढी रन खर्चिने बलर हुन् । उनले सन् २००६, १२ मार्चमा जोहानेसबर्गमा भएको खेलमा दक्षिण अफ्रिकाविरूद्ध १० ओभरमा १ सय १३ रन खर्चेका थिए । अस्ट्रेलिया र अफ्रिकाबीचको यो खेल क्रिकेट इतिहासमा सबैभन्दा बढी रन बनेको एकदिवसीय खेल हो ।
यसमा अस्ट्रेलियाले बनाएको ४ सय ३४ रनको लक्ष्यलाई पछ्याउने क्रममा अफ्रिकाले ४ सय ३८ रन बनाएर खेल जित्यो । अस्ट्रेलियाका लुइसपछि वहाब रियाज विश्वको महंगा बलर हुन् । यसपछि भारतका भुवनेश्वर कुमार पर्छन् । एकदिवसीय क्रिकेटमा सबैभन्दा महंगो बलरको सूचीमा चौथो र पाँचौ नम्बरमा न्युजिल्यान्डका एम स्नेडेन र टिम साउथी हुन् ।
स्नेडेनले ९ जुन, सन् १९८३ मा इङ्ल्यान्डविरूद्ध १२ ओभरमा १ सय ५ रन खर्चेका थिए । त्यतिबेला एकदिवसीय खेलमा १२ ओभर गर्ने चलन थियो। यस्तै, साउथीले ८ मार्च, सन् २००९ मा भारतविरूद्ध १ सय ५ रन खर्चेका थिए ।
वहाब रियाजले यसअघि पनि पाकिस्तानबाट एकदिवसीयमा बढी रन खर्चि सकेका छन् । तर, सयभन्दा बढी रन खर्चेको भने यो पहिलो अवसर हो । सन् २०१३ को १७ मार्चमा जोहनेसबर्गमा उनले दक्षिण अफ्रिकाविरूद्ध १० ओभरमा ९३ रन बनाएका थिए ।