ग्याबिन जालीको पर्खाल बाढीले बगायो

म्याग्दी नदीको कटानका कारण उच्च जोखिममा परेको म्याग्दीको बेनी नगरपालिका–२, बगरफाँटलाई जोगाउनका लागि म्याग्दी नदीको किनारामा लगाइएको ग्याविन पर्खाल बाढीले बगाएपछि बगरफाँट गाउँ पुनः जोखिममा परेको छ ।
रुपाताल संरक्षण एकीकृत विकास परियोजना कास्कीको ५० लाखको लागतमा बगरफाँटको दुधेखोलादेखि बाङ्गेरासम्म करिब २ किलोमिटर क्षेत्रमा ग्याविन जाली भरेर तटबन्ध गर्ने योजना अनुसार रातोढुङ्गादेखि झोलुङ्गे पुलसम्म ४ सय ७० थान ग्याविन जाली भरेर पर्खाल लगाइएको थियो । यही साउन दोस्रो साता म्याग्दी नदीमा आएको बाढीले सो क्षेत्रको १ सयभन्दा बढि ग्याबिन जाली बगाएपछि पुनः ग्याबिन पर्खाल लगाउने काम सुरु भएको बगरफाँट म्याग्दीखोला नदी नियन्त्रण योजना उपभोक्ता समितिका अध्यक्ष नारायण कार्कीले बताए ।
कार्कीका अनुसार संघीय सांसद भूपेन्द्रबहादुर थापाको पहलमा रुपाताल संरक्षण एकीकृत विकास परियोजनाले बगरफाँटको वस्ती संरक्षणका लागि डिपीआर तयार गरी १ वर्ष भित्रमा काम सम्पन्न गर्नेगरी संरक्षण आयोजनाको काम सुरु भएको थियो । गतवर्ष नदी कटानबाट अति प्रभावित क्षेत्र जरुवादेखि डम्मराको पुलसम्म ४ सय ७० थान जाली भरिएकोमा १ सय थानभन्दा बढी जाली बाढीले बगाएर क्षति पु¥याएको हो । २०५७ सालमा म्याग्दी नदीमा आएको बाढी र त्यसपछि निरन्तर रुपमा म्याग्दी नदीको कटानका कारण गाउँ नै जोखिममा परेपछि विगतका वर्षहरुमा सामान्य ग्याविन जालीको प्रयोग गरी नियन्त्रणको प्रयास गरिएको भए पनि त्यो प्रभावकारी भएको थिएन ।
करिब २ सय घरधुरीको बसोबास रहेको बगरफाँट गाउँ हिउँदमा खतरामुक्त रहेपनि वर्षामा भने नदी कटानका कारण सधैं जोखिममा रहने गरेको स्थानीयले बताएका छन् । गतवर्ष स्थानीय पूर्वाधार तथा साझेदारी कार्यक्रममार्फत प्राप्त १० लाखबाट नदीजन्य वस्तुहरुको स्थानान्तरण गराई उच्च जोखिममा रहेका बगरफाँटका पलाँसे, खहरेखोला, हरिहर शिवमन्दिर क्षेत्र र जरुवामा संरक्षणको काम गरिएको अध्यक्ष कार्कीले बताए ।
म्याग्दी नदीको धार परिवर्तन नहुने गरी बेनी नगरपालिका वडा नं ६ डम्मराका वासिन्दाहरुको आपसी सहमतिमा म्याग्दी नदीको करिब पाँच मिटर क्षेत्रबाट स्काभेटरको प्रयोग गरी नदीजन्य वस्तु (ढुङ्गा, गेगर, बालुवा) आदि निकालेर बगरफाँट क्षेत्रमा स्थानान्तरण गरिएको थियो । नदीले बगरफाँटको करिब १ सय ५० रोपनी क्षेत्रफलको जग्गा कटान गरेर बगाइसकेको छ भने खहरेखोला, हरिहर शिवमन्दिर क्षेत्र, पलासे र जरुवा उच्च जोखिममा परेका छन् । नदी कटानका कारण वर्षेनी त्रासमा रहने बगरफाँटवासीलाई तटबन्धले केही राहत मिलेको र गाउँको संरक्षणका लागि सम्बन्धित निकायले ध्यान दिनुपर्ने स्थानीयवासी जीतबहादुर कार्कीले बताए ।