नेपालको स्वास्थ्य क्षेत्र यति महंगो छ कि सर्वसाधारण जनताले उपचार नपाई मर्नु पर्छ । सरकारले जनताको स्वास्थ्यलाई नैर्सगिक अधिकारको रुपमा स्थापित गरेपनि जनताले सर्वसुलभ रुपमा स्वास्थ्य सेवा पाउन थालेका छन् । जटिल रोगको कुरै छाडौं जीवन जलको घुट्को नपाई जाजरकोटका जनताहरुले ज्यान गुमाउनु परेको छ । स्वास्थ्य संस्थाहरु शहर बजारमा मात्रै केन्द्रित हुँदा ग्रामिण क्षेत्रका जनताहरुले स्वास्थ्य चौकीमा सिटामोल समेत पाउन सकेको छैनन् । गाउँका स्वास्थ्य संस्थाहरु अहिले पियनको भरमा समेत पर्नु परेको छ । सरकारले ग्रामिण क्षेत्रका जनतालाई स्वास्थ्य सेवा सर्वसुलभ रुपमा उपलब्ध गराउन नसक्नु एउटा कारण छ भने आर्थिक अभावकै कारण उपचार नपाउँदा ज्यान गुमाउने सर्वसाधारण पनि धेरै ।
हरेक दिन संचारमाध्यमरुले आर्थिक अभावकै कारण उपचार पाउन नसक्दा कतिपय सर्वसाधारणले त अस्पतालको छतबाट फाल हानेर ज्यान गुमाएका छन् । सरकारले उपचारको लागि प्रतिव्यक्ति १ लाखको व्यवस्था गरेपनि त्यसको बारेमा सर्वसाधारण जानकार छैनन् । यसले गरिब जनता उपचार गर्न नपाई मर्ने विवश छन् । सरकारले ल्याएका यस्ता कार्यक्रमको बारेमा देशका ग्रामिण क्षेत्रमा सचेतना जगाउन जरुरी छ । नेपालमा धेरै निम्न वर्गका जनताहरु उपचार गर्न नसक्दा घरमा काल पर्खेर बसिरहनु पर्ने अवस्थाको अन्त्य गर्नको लागि सरकारले कार्यक्रम ल्याउन जरुरी छ । नेपाल सरकारले गत बर्षदेखि सामाजिक स्वास्थ्य सुरक्षा विमा कार्यक्रम ल्याएको छ । यो कार्यक्रम संचालन आएपछि विमितले स्वास्थ्य उपचार पाउन थालेका छन् । यो कार्यक्रम गरिब जनताको लागि बरदान हुने भएको हुँदा यसको पहँुच सबै पर्न जरुरी छ । सरकारको पछिल्लो तथ्यांक हेर्दा बागलुङका धेरै सर्वसाधारणले स्वास्थ्य बिमा गराएको पाईएको छैन । यसको बारेमा जानकारी नहुँदा सर्वसाधारणले बिमा नगरेका हुन । स्वास्थ्य उपचारमा सरकारबाट पाईने सहुलियतको सदुपयोग गर्नको लागि भएपनि हरेक नागरिकले स्वास्थ्य बिमा अनिवार्य गर्न जरुरी छ ।
स्वास्थ्य बिमा गरेकाले धौलागिरी अञ्चल अस्पताल बागलुङसहित प्राथमिक स्वास्थ्य केन्द्रबाट उपचार दिन सुरु गरेको छ । यसको बारेमा सम्बन्धित निकायले गाउँ गाउँमा प्रचार प्रसार गर्न जरुरी छ । जिल्लामा अहिलेसम्म ४ हजार ५० जनाले स्वास्थ्य बीमाका लागि फाराम भरेका छन् । यो जिल्लाको जनसंख्याको आधारमा अत्यन्तै कम हो । जिल्लाका सबै नागरिककलाई स्वास्थ्य बिमामा सहभागि गराउनको लागि चेतना जगाउन आवश्यक छ । बिमा गराउन जिल्लाभर ५१ जना दर्ता सहयोगी परिचालन भएका छन् । सहयोगीहरुले जिल्लाका गाउँ गाउँमा गएर स्वास्थ्य बिमाको प्रभावकारिताबारे बुझाउनु पर्छ । सानो रकम बिमा गर्दा सामान्यदेखि जटिल प्रकारका रोगको उपचार सुविधा सम्पन्न अस्पताल गराउन सकिने हुँदा बिमा गरेर नागरिक स्वास्थ्यप्रति ढुक्क हुनुपर्छ ।
