सोल्टीमा ओली र स्वराजबीच भेटवार्ता

काठमाडौं, १८ माघ – नेकपा एमालेका अध्यक्ष केपी शर्मा ओलीले नेपालको दुईदिने भ्रमणमा रहेकी भारतीय विदेशमन्त्री सुष्मा स्वराजसँग भेटवार्ता गरेका छन्। बिहीबार अपराह्न काठमाडौं आइपुगेकी स्वराजसँग अध्यक्ष ओलीले साँझ साढे ६ बजे होटल सोल्टीमा भेट गरेका हुन्। ओलीले सोल्टीमै स्वराजको सम्मानमा रात्रीभोज आयोजना गरेका छन्।
भेटमा नेपाल–भारत द्धिपक्षीय सम्बन्ध, पारस्परिक हित र आगामी सरकारसँग सहकार्यका विषयमा छलफल भएको ओलीको निजी सचिवालयले जनाएको छ। भेटमा स्वराजले वाम गठबन्धन नेतृत्वको आगामी सरकारसँग सहकार्य गर्न भारत आतुर रहेको बताएकी थिइन्।
६ महिने नाकाबन्दीबाट चिसिएको नेपाल–भारत र भारत–ओली सम्बन्ध सुधारका रुपमा स्वराजको भ्रमणलाई लिइएको छ। उनी भारतीय प्रधानमन्त्री नरेन्द्र मोदीको दूतको रुपमा आगामी सरकारसँग सहकार्यको वातावरण बनाउन नेपाल आएको बताइन्छ।