बागलुङ बजारमा अहिले सवारी साधनको चाप निकै बढ्दो छ । बढ्दो सवारीको चापसंगै ट्राफिक व्यवस्थापनमा समस्या भएको छभने पैदल यात्रुलाई समेत आवतजावतमा समस्या सिर्जना भएको छ । यातायात व्यवसायीबीच बढ्दै गएको प्रतिष्पर्धा र सवारी साधनप्रति नागरिकको आर्कषण बढ्दा साँघुरो बागलुङ नगरमा यातायातका साधन बढ्दै गएका छन् । ट्राफिक जामकै कारण यात्रुले तनाव झेल्नुका साथै पैदलयात्रुलाई समेत हैरानी हुने गरेको छ । ट्राफिक जामको समस्या पूर्णरूपमा नियन्त्रण गर्न निकै कठिन हुने भएपनि केही सरल उपाय अपनाएमा निकै हदसम्म यो समस्याबाट मुक्ति पाउन सकिन्छ । ट्राफिक व्यवस्थापनलाई चुस्त बनाउनको लागि बजारमा ट्राफिक संकेतको व्यवस्था गरेपनि त्यसको पुर्ण रुपमा पालना गरेको भने देखिदैन । बजारमा सुविधा सम्पन्न पार्किङको व्यवस्था नहुँदा होटल र चोकहरुबाट सवारी छुटाउने प्रचलन व्याप्त बन्दै गएको छ ।
ट्राफिक प्रहरीमा दरबन्दी अनुसारका कर्मचारी नहुँदा पनि सवारी आवतजावतलाई चुस्त बनाउनको लागि समस्या सिर्जना भएको छ । अर्काेतर्फ स्वयम् सवारी चालकहरुले ट्राफिक नियम पालना नगर्दा दुर्घटना निम्तनेदेखि लिएर बजार कुरुप बन्दै गएको छ । ट्राफिक व्यवस्थापनलाई चुस्त बनाउनको लागि प्रहरी प्रशासनमात्रै सक्रिय भएर संभव छैन । त्यसको लागि स्वयम् चालक र नागरिक पनि उत्तरदायी बन्न जरुरी छ । ट्राफिक व्यवस्थापन हुन नसक्दा बजार कुरुप मात्रै होइन भयानक दुर्घटना समेत निम्तने खतरा छ । त्यसको लागि हामीले आफ्नो आफ्नो ठाउँबाट जिम्मेवारी पुरा गर्न जरुरी छ । प्रत्येक वर्ष नयाँ गाडी थपिँदै गर्दा बागलुङ बजारको बाटो साँघुरो हँुदै गएका छन् । प्रभावकारी नीति र त्यसको कार्यान्वयन गर्न सके बजारमो ट्राफिक समस्या हल हुने देखिन्छ । यसतर्फ हामीले नजर पु¥याउन अब ढिलो गर्नु हुँदैन । यसैगरी, पुराना सवारीले सडकमा जाममात्र होइन, प्रदूषणसमेत बढाइरहेका छन् । यस्ता सवारीको विषयमा अहिलेसम्म बहस हुन सकेको छैन् । थोत्रा सवारीले दुर्घटना निम्त्याउनेसंगै मानवीय गंभीर असर गर्ने प्रदुषण समेत फैलाई रहेका छन् । यस्ता सवारीलाई पनि अब व्यवस्थापन गर्नको लागि सम्बन्धित निकायले ध्यान पु¥याउन जरुरी छ । सबैभन्दा बढी दुर्घटना निम्त्याउने पुराना सवारीको अब छिट्टै विकल्प खोज्न जरुरी छ ।
