अमृत बास्कुने
म्याग्दीको सदरमुकाम बेनी बजार क्षेत्रमा रहेका सहकारी संस्थाहरुले नगरपालिकालाई नै नटेर्ने गरेका छन् । सहकारी संस्थाहरुलाई आफ्नो यथार्थ विवरण अध्यावधिक गर्नका लागि पटक–पटक गर्ने ताकेतालाई समेत उनीहरुले बेवास्ता गर्ने गरेका छन् ।
१० वडा रहेको बेनी नगरपालिकाको ग्रामिण भेकमा रहेका सहकारीहरुले बरु अध्यावधिक गर्ने सोध्ने गरेतापनि बजार क्षेत्रमा रहेका संस्थाहरुले बढी अटेरी गर्ने गरेका हुन् । बेनी नगरपालिका कार्यक्षेत्र भएर सञ्चालनमा रहेका सहकारी संस्थाहरुले नगरपालिकाले गर्ने ताकेतालाइ समेत वेवस्ता गर्ने गरेको नगरपालिकाले जनाएको छ ।
आफ्नो क्षेत्र भित्र रहेका सहकारीको नियमन गर्ने निकाय नै नगरपालिका भएतापनि उसकै निर्देशन समेत सहकारी संस्थाहरुले वेवास्ता गर्ने गरेको नगरपालिकाकै गुनासो रहेको छ । नगरपालिका कार्यक्षेत्र भएका ५५ सहकारी संस्थाहरु रहेको भएतापनि उनीहरुले राज्यले तोकेको नियमित काम समेत नगरेर अटेर गर्ने गरेको बेनी नगरपालिका सहकारी शाखा प्रमुख प्रभा शर्माको भनाई छ । सहकारीहरुलाई उनीहरुले गर्ने कारोवार लगायतको राज्यलाई उपलब्ध गराउनु पर्ने विवरण पटकपटक माग गर्दा पनि नबुझाएको उहाँको गुनासो छ ।
कोपोमिसमा अध्यावधिक गर्नु पर्ने विवरणहरु पनि समयमै अध्यावधिक नगर्दा आफूहरुले योजना बनाएर काम गर्ने वातावरण समेत नहुने बेनी नगरपालिकाका प्रमुख प्रशासकीय अधिकृत अर्जुन शर्माको भनाई छ । सहकारी तथा गरिबी सम्बन्धी व्यवस्थापन सूचना प्रणालीको छोटकरी नाम कोपोमिस हो ।
सहकारी क्षेत्रको सुचना, तथ्याङ्कहरूलाई नियमित, विश्वसनीय, वास्तविक बनाई व्यवस्थापन सूचना प्रणालीमा आधारित अनुगमन, नियमन पद्धति स्थापित गर्न तयार गरिएको आधुनिक सूचना प्रणाली कोपोमिसमा सहकारी संस्थाहरुले अध्यावधिक गरिदिएको खण्डमा नियमन गर्न सहज हुन्छ ।
सक्रिय रहेका सबै सहकारीका प्रतिनिधिलाई तालिम दिएको र अध्यावधिक गर्न आग्रह गर्दा पनि समयमै अध्यावधिक नगर्दा समस्या भएको उहाँको भनाई छ । चालु आर्थिक वर्षमै सहकारीका सञ्चालक तथा व्यवस्थापकको काम कर्तव्य अधिकार र जिम्मेवारी तथा कोपोमिस अपडेट सम्बन्धी प्रशिक्षण नगरपालिकाले गरेको उहाँको भनाई छ ।
त्यस्तै सहकारी रजिष्टार कार्यालयकै आयोजना र बेनी नगरपालिकाको समन्वयमा पनि प्रशिक्षण भएको भए पनि सहकारी संस्थाहरुले अध्यावधिक गराउने तर्फ ध्यानै नदिएको जस्तो देखिएको उहाँ बताउनु हुन्छ । विगतमा शुन्य प्रया थियो केही सामान्य सुधार मान्न सकिए पनि सोचे अनुरुप सहकारी संस्थाहरुले चासो दिएको पाइदैन ।
सहकारी शाखा प्रमुख शर्माले कि अध्यावधिक गर्नु कि हामीलाई उपलब्ध गराउनु हामी नै अध्यावधिक गर्छौं भनेर आग्रह गर्दा पनि उपलब्ध गराउन आनाकानी गर्ने गररेको सुनाउनुभयो । फोन सम्पर्क गर्ने तथा पत्राचार गर्ने गर्दा पनि सहकारी संस्थाहरुले खासै चासो नदेखाएको उहाँको भनाई छ ।
नगरपालिका कार्यक्षेत्र रहने गरी ५५ सहकारी दर्ता भएको भए पनि हाल सम्पर्कमा रहेर सक्रिय अवस्थामा ४३ सहकारी संस्थामात्रै रहेको बेनी नगरपालिकाले जनाएको छ । नगरपालिकाका अनुसार १२ वटा सहकारी अस्तीत्वमा देखिएका छैनन् ।
